شعر حـــُــر " الحكاية "

قصيدة الحكاية التي حصلت علي المركز الأول علي مستوي الجامعات عام 2002م

الحكاية..

كلمة واحدة

فرطنا فيها

م البداية ..

الحكاية ..

دم عربي

كتبنا بيه

كلمة نهاية ..

الحكاية ..

مش مسرحية،

أو رواية بتبتدي ..

الحكاية ..

دم شعب

أنظلم

داق الألم

وهو لسه بيهتدي ..

الحكاية ..

كلمة حرة

بدئها محمد الدرة ..

مــَّـد إيديه

قال خلاص ..

بعد إيه ؟!!

طلع الرصاص ..

شق الطريق لقلب أبوه

كل الناس وقفوا شافوه

انتفضنا؟!

وقولنا بكره

هيبقي نصره

ما هو جزء م الحكاية ..

تبقي الحكاية انتفاضة ؟!!

لأ .. و لا حتي

عروض أو موضة ..

هي أكبر من كدا

يعرفها الشاب في الجامعة ،

و حتي الطفل في الروضة ..

هي أرض .. هي عرض

شرف انداس ..

خيبة .. ما هيش طيبة

ما فيش إحساس..

الدم ..؟!!

الدم أكتر م الرصاص ..

و الهم !!

الهم ليه مقاسات

لكن في حكايتنا ،

ليه أي مقاس ..!!

مش قولتلك ..

دي مسرحية ..

دنيا تانيا ..

دور مناضل ..

بيرد باطل ..

بيرد حقه بدم قلبه ،

و دور كلاب ..

نارهم سراب ..

عاملينها بإيدينا ،

حطوا راسنا في التراب ..

الحق !!

الحق عمره ما كان مقاطعة ..

الحق نور شمسه ساطعة ..

بس من غير النضال ،

و رفض الظلم من الخيال

تبقي دي هي النهاية ..

الحق !!

الحق إيد هترجعه ..

مش كلمة واحدة تضيعه ..

بقلبي و كل نبض في

شراييني باسمعه ..

عمر السكوت ..

أو حتي نبض

بعد موت ..

أو حتي صمت

في بطن حوت هايرجعه ..

لازم يلاقي قوة واحدة

تدفعه ..

ترفعه ..

عرفت إيه هي الحكاية ؟!!

و دورنا جوا سطور

الرواية ؟!!

أحكيها لك م البداية ؟!!

مستحيل !!

قلبك حجر ..

هو أنت إيه؟!!

مش م البشر !!

دي الحكاية سطر واحد ..

عمر واحد ..

أرض راحت ..

فرطنا فيها

م البداية ..

هي دي كل الحكاية ..

للأسف ..

هي دي كل الحكاية ..

الشاعر / كمال الصياد