" صمتي يقتلني ، وعجز كلماتي يحطم طموحاتي في أن الوحدة لن تتحقق .. أو أن الوحدة بداخلنا قد تصبح يوماً منصة إعدام عروبتنا ..!! "
أوكازيون
قرب .. قرب
تعالي بص و جرب ..
تعالي شوف
و اتفرج ..
كلامنا بجد
مش بنهرج ..
دي حتة أرض
ملهاش صاحب ..
خالية من أي
متاعب ..
و ميزتها فيها بترول ..
و فلوس زي ماتقول ..
قول ..
وصاحبها هتدوسه برجليك
علي طول ..
ما أنت اللي علمته
و أنت اللي دربته
وبنظرة منك
بيتكهرب ..
و إوعي مني تستغرب ..
قرب .. قرب
دي حتة أرض بالفدان ..
صاحبها باعها بالمجان ..
بسهرة وكاس
مع دخان ..
وجاي دلوقتي
آل ندمان ..
بيتعصب ..
قرب .. قرب
دا لسه فيه
يجي عشرين !!
بس يا تري
الدور علي مين ؟!!
وحجة النووي
راحت فين ؟!!
هو أنت بتغلب ..
من غير أي حاجة
بتضرب !!
قرب .. قرب !!
الشاعر / كمال الصياد
